На иницијатива на Министерството за животна средина и просторно планирање, Владата на денешната седница го усвои текстот на Предлог законoт за прогласување на Охридско Езеро за заштитено подрачје во категорија III – споменик на природата. Тој ќе биде доставен за усвојување до Собранието на РСМ.
Според предлог законот, Охридското Езеро се прогласува за споменик на природата заради геоморфолошките и хидролошките карактеристики, исклучителните природни вредности како дел од Светското природно наследство на УНЕСКО и еден од најважните рефугиум центри на биолошката разновидност во европски и светски рамки.
Со споменикот на природата – Охридско Езеро ќе управува Јавното претпријатие Колекторски систем. Планот за управување со Споменикот на природата – Охридско Езеро ќе треба да се донесе најдоцна во рок од една година од денот на влегувањето во сила на овој закон.
Со прогласување на споменикот на природата – Охридско Езеро се овозможува:
• заштита и зачувување на природната состојба на Охридското Езеро преку заштита и зачувување на живеалиштата и видовите од национално и Европско значење и заштита на другите природните вредности;
• спречување на дејствија што можат непосредно или посредно да предизвикаат нарушување на живеалиштата и екосистемите;
• создавање на поволни услови за заштита, зачувување и унапредување на биолошката и пределската разновидност;
• одржливо користење на природните ресурси на начин на кој не се загрозува опстанокот на живеалиштата и видовите.
Процесот е поддржан од Програмата на Обединетите нации за животна средина (УНЕП) во Виена и Меѓународната унија за заштита на природа (IUCN), Канцеларија за Источна Европа и Централна Азија (ECARO) и од национални институции и експерти.