Во Грција се крена нова паника по денешното апсење на тројца Британци со потекло од Ирак за поседување големо количество оружје и муниција во Александруполи.
Весникот „Етнос“ пренесува дека при претресот на приколка која била следена со денови, полиција нашла три револвери марка „магнум“ и уште минимум 15 револвери со калибар од 22 милиметри и уапсила двајца мажи на возраст од 28 и од 22 години. Покрај оружјето била најдена и муниција, и тоа повеќе од 20.000 куршуми.
По нивното апсење бил најден и третиот нивен соработник, Британец со ирачко потекло, кој се обидувал со автомобил да премине во Турција. Во негова сопственост биле најдени 200.000 касети со муниција, десетици парчиња оружје и друга воена опрема.
Уапсените за време на испитот демантирале дека се дел од Исламска држава и изјавиле дека се дел од револуционерните групи што се борат против ИД. Тројцата денеска ќе бидат изведени пред суд за нелегално поседување оружје.