Непознато лице во средата вечер успеало да украде трамвај во Загреб, да го вози еден и пол километар по трамвајската мрежа, а откога стигнало на посакуваната станица, да го остави и да побегне во непознат правец, информираат хрватската полиција.
Полицијата во Загреб добила пријава за украдениот трамвај во средата во 23:15 часот. Трамвајот бил украден од последната станица во населбата Љубљаница. Од полицијата известија дека немало патници за време на кражбата на трамвајот, освен непознатото лице кое управувало со возилото.
Хрватската полиција ги прегледува видео записите од трамвајот за да го утврди идентитетот на лицето. Од јавното претпријатие ЗЕТ-Загреб информираат дека трамвајот не бил оштетен, при што тие допрва ќе утврдуваат кој е одговорен за пропустот кој довел до кражба на трамвајот.