Млад бегалец од Ирак е пренесен со тешки повреди во болница во Атина откако ноќеска бил нападнат од група бегалци во бегалскиот камп Суда на Хиос. Момчето има сериозни повреди на главата и по целото тело и се наоѓа во критична состојба.
Бегалецот првично бил пренесен во болница во Хиос, но поради критичната состојба веднаш е префрлен во Атина. Според информациите во Грција, бегалецот бил веројатно нападнат од група бегалци од Авганистан. Полицијата сè уште трага по групата напаѓачи. Полициски извор за грчката информативна агенција АПЕ изјавил дека дури и да бидат најдени напаѓачите, најверојатно е дека нема да бидат казнети, туку ќе бидат пуштени на слобода. Ова, според него, е проблематично и доведува до постојаните насилни судири во бегалскиот камп на Хиос. Изворот за АПЕ посочил и дека оние кои предизвикуваат немири и напади честопати остануваат на слобода бидејќи затворите и казнените установи на островот се преполни, а бегалците и мигрантите не се префрлаат во бегалските центри на копно поради договорот меѓу ЕУ и Турција, а центрите на Хиос се веќе преполни.
Пред само една недела бегалците на Хиос беа сведоци на уште една бегалска драма кога момче од Сирија се самозапали во знак на револт. Бегалецот им подлегна на повредите.
На Хиос има речиси 5.000 бегалци.