Сириските безбедносни сили привремено ги суспендираа своите операции во источен Алепо за да се обезбеди евакуација на цивили кои се „заробени“ во борбената зона, соопшти рускиот министер за надворешни работи, Сергеј Лавров.
За време на прекинот на огнот, како што рече Лавров, би требало да се извлечат околу 8.000 луѓе.
САД го поздравија ваквото решение, но сепак се резервирани во поглед на тоа како ќе биде изведено извлекувањето.
– Нашиот приод кон ситуацијата во Алепо е внимателно да го ослушнуваме она што го вели Русија, но сме внимателни и кон сите нови акции што се преземаат – изјави претставник на Белата куќа.
Шефот на руската дипломатија најави дека в сабота во Женева ќе се одржи средба на руските и на американските експерти, на која ќе се разговара за завршувањето на насилствата во Алепо.
Во меѓувреме, рускиот центар за помирување на завојуваните страни во Сирија соопшти дека во последното деноноќие околу 8.500 жители на Алепо го напуштиле делот од градот што е под контрола на бунтовниците. Меѓу евакуираните се и 2.934 деца.