Советот за безбедност на Обединетите нации денеска едногласно го номинираше поранешниот португалски премиер Антонио Гутереш за генерален секретар на светската организација и му порача на Генералното собрание на ОН да го именува со мандат од пет години, од 1 јануари.
Генералното собрание веројатно ќе се состане следната недела за да го одобри именувањето на 67-годишниот Гутереш, кој ќе го замени Бан Ки-мун од Јужна Кореја.
Вториот мандат на Бан Ки-мун истекува кон крајот на 2016 година.
Гутереш беше премиер на Португалија од 1995 до 2002 година, а беше и висок комесар за бегалци на ОН од 2005 до 2015 година.