Дипломатските несогласувања меѓу Русија и Турција продолжуваат поради соборувањето на рускиот авион. И двете страни не отстапуваат од своите ставови.
Дмитриј Песков, портпаролот на Кремљ, рече дека претседателот Владимир Путин нема да се сретне со турскиот претседател Реџеп Таип Ердоган за време на Самитот за климатските промени, сè додека Турција не се извини за уривањето на рускиот авион.
Истовремено во Брисел, турскиот премиер Ахмет Давутоглу изјави дека ниту една земја на треба да се извинува поради тоа што го штити сопствениот воздушен простор.
Анкара и понатаму стои на тврдењата дека рускиот авион го повредил турскиот воздушен простор на 24 ноември и оти пилотот се оглушил на предупредувањата од турска страна.
Давутоглу, исто така, рече дека Москва треба да ги разгледа економските санкции што рускиот претседател Путин ги воведе на 28 ноември.
Главниот секретар на НАТО, Јенс Столтенберг, изјави дека Алијансата е загрижена поради зголеменото руско присуство во регионот.