Секторот за внатрешни работи Битола до гостиварското обвинителство поднел кривична пријава против В.М. (38) од Прилеп, кој се товари за неовластено производство и за пуштање во промет на наркотични дроги, психотропни супстанци и прекурсори, информира МВР.
Според полицијата, осомничениот во изнајмена куќа во Македонски Брод, одгледувал марихуана во саксии.
„Пријавениот поставил пропагатор за расад во кој засадил 15 семки од растението канабис, кои претходно ги имал набавено од Чешка. Од нив никнале 12 коренчиња кои ги пресадил во пластични саксии и ги поставил во дворот од куќата“, информираат од полицијата.
Кон крајот на јуни оваа година, полициска екипа од Македонски Брод при претрес пронашла и запленила 12 саксии со канабис, а осомничениот на полицајците им предал уште 52 семки од растението.