Министерот за надворешни работи во заминување, Никола Попоски, со шефот на австриската дипломатија и актуелен претседавач со ОБСЕ, Себастијан Курц, во Виена разговараше за регионалната стабилност и за потребата од интегрирање во ЕУ како најдобра гаранција за развој на Балканот.
– Што и да се случува во регионот, какви и да се предизвиците, доколку членството во ЕУ изгледа достижно, тоа ќе ги стабилизира сите земји, а ќе ги релаксира и предизвиците внатре во Унијата. Мигрантската криза, геополитичките поместувања, заканите од радикализам и од тероризам и глобалната конкурентност се само најсвежи примери за тоа дека делиме исти интереси. Единствено логично е да бараме обединување околу една кауза: да сме дел од ЕУ и од заедничкиот пазар е веројатно наједноставната гаранција за мир и за развој во Македонија и на регионот – истакна министерот Попоски по средбата.
Средбата се одржа на маргините на седница на Постојаниот совет на ОБСЕ, на кој Попоски имаше и свое обраќање.