Унгарскиот премиер Виктор Орбан денеска изјави дека на хрватскиот премиер Зоран Милановиќ треба да се гледа како на претставник на Социјалистичката интернационала чија задача е да ја напаѓа Унгарија.
– Што и да каже хрватскиот премиер, ние тоа не го сметаме за став на хрватскиот народ – рече Орбан во интервју за унгарското радио „Кошут“.
Орбан рече дека Вишеградската група, која ја сочинуваат Чешка, Унгарија, Полска и Словачка, добро соработува во врска со бегалската криза.
– Проблемот е со земјите кои кон тоа прашање пристапуваат идеолошки – рече Орбан, додавајќи дека одредени француски и италијански политичари, како и канцеларите на Германија и на Австрија се пример за оние кои на миграцијата гледаат како на „позитивен феномен кој го охрабруваат“.