Обединетите нации (ОН) привремено ја сопреа испораката на хуманитарна помош во Сирија по нападот во провинцијата Алепо, каде има најмногу мртви, меѓу кои и еден вработен во Црвената полумесечина, изјави во Женева портпаролот на канцеларијата на ОН за координација на хуманитарната помош, Јенс Лерке.
– Сите конвои се привремено запрени до новите безбедносни процени на ситуацијата – рече Лерке, потврдувајќи дека конвојот што во понеделникот бил мета на воздушни напади, превезувал и помош од ОН.
Хуманитарен конвој на ОН и на сириската Црвена полумесечина се обиде да го искористи прекинот на огнот и да достави храна и лекови за 78.000 лица кои се под опсада во Алепо. Сепак, при доставувањето на помошта, конвојот стана една од метите на бомбардирањето на градот Алепо и на околината.
Најмалку 12 цивили загинаа во воздушниот напад на конвојот, кој се движел кон провинцијата Алепо, а неколку часа подоцна сириската војска прогласи крај на примирјето.