Под силни мерки на обезбедување, со изнесување на обвинителниот акт и со сослушување на сведоците, во Основниот суд во Охрид денеска почна судскиот процес против двајцата обвинети за убиството на сопственикот на угостителскиот објект „Император“, Васил Ристески, и на охриѓанецот Ромео Ѓузелоски.
На почетокот од првото судско рочиште, обвинетите се изјаснија дека не се чувствуваат виновни.
Пред Судскиот совет денеска искази дадоа мајката и таткото на Ѓузеловски, како и потесното семејство на сопственикот на „Император“.
Убиството се случи во август минатата година, на улицата 15. Корпус, во угостителскиот објект „Император“. Од истрелите смртно настрадаа 56-годишниот Ристески и 38-годишниот Ѓузелоски.
Триесет и едногодишниот Б.П. од Охрид, кој беше осомничен за двојното убиство, веднаш по трагедијата се даде во бегство и по него беше распишана меѓународна потерница. По шест месеци тој беше пронајден од полицијата во Албанија и беше екстрадиран во Македонија.