Две недели по двете масовни убиства во Србија, земјата се соочува со нов бран дојави за поставени бомби во различни објекти, првенствено во училишта, пренесе Би-би-си на српски јазик.
Кон средината на оваа недела, повеќе од 100 основни и средни училишта во Белград добија анонимни дојави за бомби, за кои подоцна беше утврдено дека се лажни, а ден подоцна слични закани добија и образовните институции во војводинските градови Нови Сад и Сомбор.
Денеска во утринските часови дојави за бомби добија и Воено-медицинската академија во Белград, една од најголемите здравствени установи во земјава, Клиничкиот болнички центар „Ѕвездара“, како и Зоолошката градина во Белград.
Во тек е евакуација на јавните и спортските институции, трговските центри и факултетите во Нови Сад поради дојави за поставени бомби, потврди српската полиција за Танјуг.
Засега се евакуирани Спенс, Техничкиот факултет, Каменичкиот институт, Железничката станица, Филозофскиот факултет и трговскиот центар Меркатор.
На е-маил адресите на надлежните служби и медиумите е испратена порака, во која се вели дека „бомбите се темпирани да се активираат денеска, во текот на утрото и рано попладне“.
Контра-субверзивни екипи на полицијата се на терен и вршат проверки, јави Радио-телевизија Србија.