Израелската амбасада во Атина беше мета на вооружен напад рано изутринава. Зградата на амбасадата во атинската населба Нео Психико била нападната околу 3 часот наутро, со оружје од типот „калашников“. Околу зградата се најдени 54 истрелани куршуми. Во нападот нема повредени и причинета е само голема материјална штета на фасадата на амбасадата.
Полицијата го води случајот како терористички напад, а истрагата ја води специјалната антитерористичка единица. Се испитуваат снимките од безбедносните камери и целата околина околу амбасадата за да се лоцираат движењата на напаѓачите. Првичните претпоставки се дека се работи за двајца напаѓачи кои застанале пред амбасадата со мотор, но имале и поддршка од други двајца.
Полицијата стравува дека се работи за повторување на сценарио на напад од минатата година. Пред една година, на 30 декември, на сличен начин беше нападната и резиденцијата на германскиот амбасадор, односно зградата беше мета на вооружен напад од „калашников“. Одговорноста за нападот тогаш ја презеде терористичката единица Група на народните борци, која претходно го имаше нападнато и седиштето на Нова демократија.