Силите на сирискиот режим во март минатата година извршиле и трет напад со хемиско оружје, било наведено во извештајот, кој меѓународен тим на експерти синоќа му го доставил на Советот за безбедност на Обединетите нации, јавува „Би-би-си“.
Во доверливиот извештај, кој протекол во медиумите, било наведено дека има доволно докази дека сириските сили се одговорни за нападот со хемиско оружје во провинцијата Идлиб, на 16 март 2015 година.
Според документот, хеликоптери на сириската влада фрлиле буриња-бомби кои содржеле гас хлорин врз цели во Идлиб.
Организацијата за забрана на хемиското оружје, во еден од претходните извештаи, ја обвини сириската влада за други два напади со гас во 2015 година.
Сирија во 2013 година се согласи да го уништи арсеналот со хемиско оружје, согласно условите што ги договорија Москва и Вашингтон.