Еврокомесарот Кристалина Георгиева, која е кандидат на Бугарија за генерален секретар на Обединетите нации, се обрати на Генералното собрание на организацијата.
Таа истакна дека додека работела во Светска банка и во Европската комисија, имала можност да направи длабоки промени и реформи во различни сектори.
– ООН мора да биде ефикасна и иновативна организација и мора подобро да го рефлектира светот каков што е – рече Георгиева, која говореше околу два часа и додаде дека мора да се најдат брзи решенија за светот кој брзо се менува – од економските проблеми до проблемите со глобалното затоплување.
– Можам да ги обединам луѓето околу решенија кои сите мора да ги поддржиме. Ова е време на неизвесност, но, исто така, и време за храброст. Не можеме да попуштиме пред екстремната сиромаштија. Не смееме да се предадеме пред климатските промени. Не смееме да потклекнеме пред конфликтите. Ако ја имам честа да ја водам оваа организација, ќе го направам тоа со независност, единство, сочувство и со ревност за резултати – посочи Георгиева.
Прашана за бегалската криза, Георгиева рече дека во овој несигурен свет никој не може да биде сигурен дали утре ќе биде бегалец или не.
За да биде избран, новиот генерален секретар на ОН треба да има барем девет гласа „за“ од 15 земји и ниту еден глас „против“ од петте постојани членки – Велика Британија, Кина, Русија, САД и Франција.