Состанок на Прекуграничната платформа за заштита на езерскиот регион, во рамките на проектот на УНЕСКО за интегрална заштита на културното и природното богатство на регионот околу Охридското Езеро, ќе се одржи утре во Подградец, Албанија.
Целта на Прекуграничната платформа е да ја интензивира соработката на прекугранично ниво помеѓу Македонија и Албанија, односно помеѓу централните, локалните власти и секторите за туризам, урбано планирање, култура и за животна средина.
Состанокот треба да ги идентификува сите можности за надзор врз животната средина и биодиверзитетот, со што би се придонело во заштитата и управувањето на светското наследство на Охридскиот Регион.
Исто така, тема на работниот состанок е идентификација на постојни иницијативи за промовирање на одржлив развој на регионот. На состанокот ќе бидат презентирани и стратегии за развој на туризам, меѓу кои и работата на стратегијата за развој на туризмот на Општината Охрид.
– Визијата за развој на Охридскиот Регион е поврзана со уникатните вредности на регионот и нивно искористување во контекст на одржливиот развој, промоцијата и привлекување на туристи – изјави Дејан Пановски од Билатералниот комитет за заштита.