Министерот за надворешни работи, Никола Димитров, утре ќе престојува во работна посета на Австрија на покана на австрискиот шеф на дипломатијата, Себастијан Курц, информираат од Министерството за надворешни работи.
Во рамките на посетата, предвидено е министерот Димитров да оствари средби и со членови на комисијата за надворешнa политика во австрискиот Национален совет, како и со претседателот на Комората на индустријалците на Австрија.
Оваа недела во официјална посета на Македонија доаѓаат двајца високи дипломати од Германија и од Австралија.
Од утре до вторник во официјална посета на Србија и на Македонија ќе биде државниот секретар за европски прашања во Министерството за надворешни работи на Германија, Михаел Рот.
Рот прво ќе го посети Белград, а потоа ќе пристигне во Скопје, но сè уште не е прецизирано со кого ќе се сретне.
Во Македонија неделава ќе пристигне и министерката за надворешни работи на Австралија, Џули Бишоп, во рамки на нејзината посета на Источна Европа планирана од 9 до 15 јули.
На официјалната веб-страница на австралиското МНР пишува дека Бишоп ќе се сретне со премиерот Зоран Заев, министерот за надворешни работи, Никола Димитров, и со претставници на невладини организации кои работат со финансиска помош на владата на Австралија.