Со гласовите на 136 пратеници од 49-тиот состав на бугарското Собрание, денеска за претседател на законодавниот дом беше избран Росен Жељазков од ГЕРБ-СДС, поранешен бугарски министер за транспорт, информациски технологии и комуникации, јави Бугарското национално радио (БНР).
Поточно, за него гласаа 136 пратеници, 94 беа воздржани, а немаше ниту еден против.
Според претходно постигнатиот договор на двете коалиции ГЕРБ-СДС и Продолжуваме со промената – Демократска Бугарија, кои ги постигнаа најдобрите резултати на парламентарните избори на почетокот на месецов, Жељазков може да ја напушти функцијата за да го отстапи местото на кандидат на ПП-ДБ, ако овој состав на парламентот работи подолго од три месеца.
Свој кандидат за претседател имаше и националистичката и проруска партија „В’зраждане“ (Преродба), но тој доби 139 гласови „воздржан“, 56 гласа против и 36 гласа за.
Се очекува изборот на претседателот на бугарското Собрание да биде проследен со преговори за коалициска влада во посмирена атмосфера.