Општина Берово ќе врши субвенционирање на 100% од трошоците за стерилизација на триесет женки-кучиња на територијата на општина Берово, во текот на 2023 година, соопшти општината.
Cубвенцијата се состои од покривање на 100% од трошоците кои сопственикот ги има направено за стерилизација на истото. По основ на овој јавен повик ќе бидат субвенционирани 30 лица, а истиот ќе биде реализиран по принципот „прв дојден, прв услужен“.
Повик за бесплатна стерилизација има и Ветеринарната амбуланта „Ремедиум Вет“, која се однесува на сопственици кои имаат домашни миленици, а имаат свој имот на територијата на Општина Сопиште. За повеќе информации жителите на Сопиште можат да се обратат во општината. Оваа услуга ќе трае до април 2024 година.
„Сакаме да ја поздравиме одличната иницијатива за субвенционирање на стерилизации за домашни миленици на Општина Сопиште и Општина Берово.Овие две општини и нивните градоначалници Стефче Трпковски и Звонко Пекевски се меѓу првите што го препознаа коренот на проблемот во нивните општини и овожможуваат на жителите на територијата на нивната општина да ја добијат бесплатно таа услуга“, велат од Здружението „Анима Мунди“.
Оттаму додаваат дека субвенционираната стерилизација на домашни миленици е само една мерка и голем чекор кон воспоставување на комплетна контрола на проблемот со бездомната популација на кучиња.
„Се надеваме дека овој пример на одговорност ке го следат и останатите градоначалници во нашата држава и со тоа ке дадат свој огромен придонес кон решавање на проблемот кој трае со децении“, велат од „Анима Мунди“.