Американскиот претседател Доналд Трамп денеска ги осуди неодамнешните закани кон еврејските центри во САД и ги окарактеризира како „грозни и болни“.
За време на посетата на националниот музеј на Афроамериканската историја и култура, Трамп рече дека заканите се „тажен потсетник“ за тоа што уште треба да се направи.
Во изминатите неколку недели, 27 еврејски центри во САД добија закани за подметнување бомби, а само во текот на вчерашниот ден поради такви закани се евакуирани 11 центри.
Трамп рече дека Афроамериканскиот музеј потсетува зошто треба да се бори против дволичноста, нетолеранцијата и омразата во сите облици.
– Ќе ви кажам дека антисемитизмот е грозен и ќе престане и мора да престане – рече Трамп.
Кон истрагите за бомбашките закани, кои ги води ФБИ, се приклучи и министерството за правосудство.