За една недела ќе почне реконструкцијата на коритото на реката Шемница во делот на општина Могила. По големите поплави од февруари оваа година, кога во Пелагониско беа под вода илјадници хектари земјиште, ќе се прави регулација на коритото на реката во должина од 260 метри, кај железниот мост во атарот на селото Могила.
Во исто време, во реката Шемница ќе се огради и капалиште каде мештаните ќе можат да се разладуваат и одмораат во летните денови. Градоначланикот на Општина Могила, Стевче Пивковски, вели дека прокетот чини пет милиони денари, а средствата се обезбедни преку Бирото за регионален развој.
– На реконструкција на коритото на реката Шемница кај селото Могила се чекаше дури 20 години. Сега парите ги обезбедивме преку заеднички прокет на Пелагонискиот плански регион за трите општини, Могила, Новаци и Демир Хисар, проект кој вкупно изнесува 20 милиони денари. Ова уредување на коритото на реката Шемница нема да значи само реконструкција, туку ќе се прави и базен, што ќе се користи за разладување и за одмор на жителите на општината во летните месеци – вели градоначалникот Пивковски.
Што се однесува, пак, до најгорливиот проблем на могилчани и, воопшто, на жителите на пелагонискиот регион, реконструкцијата на коритото и чистењето на реката Црна, Пивковски вели дека тој прокет треба да го реализира Дирекцијата за заштита и спасување, бидејќи Црна е пакосна за сите пелагонски општини, Прилеп, Могила, Новаци и Битола и не би смеело парцијално да се третира.
А.Б.