Пакистанскиот суд издаде налог за апсење на поранешниот премиер Наваз Шариф, под сомневање дека учествувал во два случаи на корупција.
– Судот денеска издаде налог за апсење на поранешниот премиер за два случаи на корупција и ја одложи расправата за 3 ноември – изјави еден од адвокатите на поранешниот премиер, Зафир Хан.
Шариф во моментов се наоѓа во Лондон со својата сопруга Калсум, која таму се лекува од карцином.
Поранешниот пакистански премиер е обвинет за корупција врз основа на информации објавени во таканаречените „Панама пејперс“.
Пред антикорупцискиот суд во Пакистан, освен 67-годишниот Шариф, обвинети се и неговата ќерка Маријам и зетот Мохамед Софдар, кои ги негираат обвиненијата како неосновани.
Врховниот суд на Пакистан го дисквалификува и го смени Шариф од премиерската функција во јули, откако во „Панама пејперс“ беше откриено дека неговото семејство поседува имот во странство, кој не го пријавил.