Меѓународната манифестација „Струшки вечери на поезијата“ беше претставена на Интернационалниот поетски фестивал во Истанбул, каде паралелно се одржува и Меѓународен саем на книгата.
Презентацијата е дел од соработката со фестивалот во Истанбул во рамките на која се предвидени низа активности, како преведувачки работилници, издавачки проекти и претставување на најзначајните поетски творци во рамките на обата фестивала.
Пред публиката пригодно се обратија директорот на СВП, Мите Стефоски, и претседателот на управниот одбор, Славе Ѓорѓо Димоски.
Тие зборуваа за историјата, структурата и за значењето на фестивалот и за неговата улога во промоција на врвните поетски дострели во светската поезија, како и за промоцијата на македонската поезија во светот.
Низ прикажувањето на пригоден видеозапис, беше претставено последното издание на фестивалот, а преку изложба се презентираше издавачката продукција на СВП, во која се објавени репрезентативни избори од врни светски поети, добитници на наградата „Златен венец“, антологии на национални поезии и други изданија.