Поради рекордниот број на бегалци кои влегуваат во земјата, Унгарија денес најави дека на границата со Србија ќе испрати повеќе од 2.000 полицајци.
Српско-унгарската граница во вторникот ја преминале 2.533 бегалци и тоа е најголем број на мигранти кои во еден ден влегле во Унгарија од Србија од почетокот на годината, соопшти унгарската полиција.
– Заштитата на границата од 5 септември ќе биде зајакната со уште 2.106 полицајци. Тие ќе патролираат долж границата заедно со 1.000 полицајци кои веќе се таму – изјави шефот на унгарската полиција, Каролј Пап.
Претходно портпаролот на владата, Золтан Ковач, изјави дека Будимпешта ја разгледува можноста и војската да биде ангажирана за да се обезбеди јужната граница. Тој додал дека секоја одлука за ангажирање на војската мора да биде заснована на одлука на парламентот кој ќе го разгледува ова прашање следната недела.
Унгарската полиција денес употреби солзавец на група од околу 200 мигранти кои се обиделе да го напуштат прифатниот центар за бегалци кој се наоѓа во близина на српската граница.
Унгарските војници на 3 август започнаа со градење на ограда на границата со Србија која би требала да биде готова до 31 август.