Белгиската полиција уапси маж кој со автомобил се обидел да влета во пешачка зона во Антверп, јавува „Би-би-си“.
Портпаролот на полицијата рече дека возилото било со француски регистарски таблички и дека човекот со голема брзина возел кон Де Меир, главната трговска улица во Антверп.
Според првичните информации, нема жртви.
Според весникот „Дер Штандард“, мажот бил по потекло од Северна Африка, а локалните медиуми јавуваат дека станува збор за радикализиран муслиман.
„Инцидентот се случил околу 11 часот, кога влегол во улицата Де Меир со голема брзина, поради што пешаците мораа да скокаат на страна за да се спасат – рече портпаролот на полицијата.
Околу местото каде е направен обидот за напад е поставен полициски обрач, а пиротехничарите ја истражуваат локацијата. Сè уште не е познато дали во автомобилот се пронајдени сомнителни работи или оружје.
Дополнителни воени сили се распоредени низ градот.