На состанокот на Централниот комитет на ВМРО-ДПМНЕ, кој ќе се одржи утре, околу 130 негови членови ќе ги подготват сите документи и дневниот ред за оставката на Никола Груевски и изборот на нов партиски лидер, на вонредниот конгрес на 23 декември во Валандово.
Според партискиот статут, Одлуката за вонредниот конгрес треба да ја потврдат 2/3 од членовите на централниот комитет односно околу стотина членови.
Постапката за кандидирање не е официјално отворена, но во јавноста како најсериозни кандидати се искристализираа имињата на Христијан Мицковски и Илија Димовски. Единствено Филип Петровски досега ја објави својата намера да се кандидира за лидер на партијата. Се шпекулира и за можни кандидатури на Никола Попоски, Антонио Милошоски, Никола Тодоров и на Влатко Ѓорчев.
Кандидатот за претседател треба да биде предложен од 30 делегати на конгресот. Ќе биде избран ако за него гласаат половината од 560 делегати, кои остануваат исти како на редовниот конгрес што се одржа во 2015 година во Куманово.