Советот за безбедност на ОН денеска треба да усвои резолуција за начинот на прекинување на финансирањето на милитантите на Исламска држава преку илегална продажба на нафта и на антиквитети, земање пари за ослободување бегалци и преку други криминални активности.
За таа цел, првпат ќе се сретнат министрите за финансии на 15 земји-членки на Советот.
Десет земји, меѓу кои САД, Франција, Велика Британија и Шпанија, веќе го потврдија своето учество на состанокот, кој ќе се одржува попладнево по средноевропско време.
Со резолуцијата, од земјите-членки на Советот за безбедност се бара „енергично и одлучно“ реагирање за да се секнат изворите на финансирање на ИД.
Државите се повикуваат во своите национални закони да го прогласат за тежок криминален акт финансирањето на тероризам и да ја интензивираат размената на информации на оваа тема и меѓу владите на земјите и на друго ниво.
Советот за безбедност во февруари усвои резолуција за казнување поединци и групи што ја финансираат ИД преку купување шверцувана нафта или археолошки артефакти украдени од Сирија и од Ирак.