Најавуваното снежно невреме го погоди Вашингтон, со што во американската претстолнина се очекуваат рекордни врнежи од снег од 60 до 90 сантиметри.
Снежното невреме најпрво ги зафатило јужните и источните делови на САД, поради што се откажани 7.000 летови, а седум држави прогласиле вонредна состојба.
Во Северна и во Јужна Каролина, повеќе од 112.000 луѓе останале без струја, а шест лица загинале во сообраќајни несреќи кога снежниот бран се проширил во Арканзас, Тенеси и во Кентаки.
Националната метеоролошка служба издала предупредување во најмалку 20 држави кои опфаќаат повеќе од 85 милиони луѓе. Жителите од погодените подрачја се снабдиле со поголеми количества храна и ги испразниле рафтовите по продавниците.
Снежните врнежи што се очекува да траат до недела, можат да предизвикаат штета од една милијарда долари и да парализираат една третина од источниот дел на државата.
Гувернерот на Њу Џерси, Крис Кристи, поради приближувањето на невремето, прогласил вонредна состојба и им порачал на граѓаните да останат дома. Сите автобуски линии и движењето на метрото биле прекинати, а ќе продолжат да работат кога условите ќе дозволат.
Мерки на претпазливост има и во Њујорк, каде што 600 припадници на националната гарда биле подготвени да им пружат помош на загрозените граѓани.