Апсолутно сме далеку од некои конкретни дискусии по специфични прашања, а особено сме далеку од поделба на ресори, изјави заменик-претседателката на СДСМ, Радмила Шекеринска, по средбата со претставниците на ДУИ, во хотелот „Холидеј ин“ во Скопје.
Таа изјави дека на денешната средба било дискутирано за актуелната ситуација по одлуката на претседателот Ѓорге Иванов да не го додели мандатот на втората по ред парламентарна партија и најави дека средбите и разговорите со ДУИ ќе продолжат.
– Сметаме дека овие средби и разговори ќе продолжат, дискусиите се водат во двете политички партии, но сметаме дека целта ни е заедничка. Македонија да излезе од оваа политичка криза, час поскоро да добие влада која ќе се посвети на реформите, на подобар живот на сите граѓани на Република Македонија и шанса за сите да озбезбедат вистинска егзистенција во рамките на својата татковина. На сите овие теми ќе дискутираме следниот пат. Вие сте свесни дека ова не беше долга средба. Средбите ќе продолжат тогаш кога дискусиите ќе завршат во рамки на двете политички партии – рече Шекеринска.
Потпретседателката на ДУИ, Туета Арифи, по средбата изјави дека со претставниците на СДСМ имале конструктивна дискусија, но дека последниот збор ќе го има претседателството на ДУИ.