„Граѓаните да бидат спокојни во овие празнични денови. Многу бргу во Македонија ќе се живее во демократија, слобода, еднаквост, вредностите што граѓаните ги избраа на последните избори“, порачаа СДСМ во редовното утринско соопштение.
Од партијата истакнуваат дека насилничката реторика, заканите и криминалите ќе бидат заменети со квалитетен живот за сите и со правда.
„Мнозинството граѓани се одлучија за заедништво и за интеграција, а не поделеност и изолација. Унитарна Македонија ќе биде современа држава, во чекор со демократскиот свет, општество на сите граѓани, наместо на една фамилија. Тоа е единствениот вистински пат по кој мора да се движи државата и тоа ќе се случи, бидејќи е мнозинска волја на граѓаните“, стои во соопштението.
Од СДСМ велат дека новото парламентарно мнозинство е должно тоа да им го обезбеди на граѓаните што ги претставува во Собранието.
„И мнозинската волја ќе се испочитува. Наскоро ќе се избере нов претседател на Собранието и нова реформска влада, согласно Уставот и законите на Република Македонија“, велат од СДСМ.