„Да мислеше Владата на Никола Груевски на државните интереси на Македонија, да беше навистина толку патриотски потресенa за каквa што се претставува, да си ги сакаше државата и својот народ – ќе ѝ ја нанесеа ли оваа „брука“ на Република Македонија? На Македонија ѝ е одземено правото на глас во Обединетите нации со потпис на генералниот секретар Бан Ки-мун“, рече на денешната прес-конференција Виктор Габер, член на Комисија за надворешни работи на СДСМ.
– Две години по ред нашата држава не плаќала придонеси кон светската организација. Поради неплатен долг од 24.000 долари, Македонија е во групата неплаќачи заедно со Сомалија, Руанда, Јемен или Сао Томе и со Принципе. Тоа не се ни 23.000 евра што, според информациите во јавноста, ги зела за патни трошоци од буџетот пратеничката на ВМРО-ДПМНЕ, Силвана Бонева. Што значи, има пари кога се работи за џебовите на функционерите на ВМРО-ДПМНЕ, ама нема пари кога се работи за државата. Не сме изненадени. Само жалиме што и светот стана сведок на какво дереџе паднавме како држава. Актуелната власт нема основно чувство за државен интерес и нема минимум државнички капацитет. Одговорноста е на Никола Груевски и на неговата власт и решението е едно. Мора да заминат – рече Габер.