Во автомобил „мерцедес“ пресретнат на автопатот Скопје-Гевгелија во Неготино полицијата вчеравечер запленила околу 100 килограми марихуана што требало да биде прошверцувана. На откривањето на дрогата претходела бркотница.
Според официјалното соопштение на Министерството за внатрешни работи (МВР), дрогата најверојатно потекнува од фабрика за масло од канабис (марихуана), а „на улица“ би достигнала вредност од 300.000 евра.
Според соопштението, сообраќајни полицајци од Неготино во соработка со Одделение за недозволена трговија со дрога и оружје и Одделот за криминалистичка полиција –за недозволена трговија со дрога, оружје и опасни материи ги уапсиле Б.А.(37) од с.Буковиќ, М.А.(21) од с.Копаница и Н.А.(18) од с.Буковиќ.
Дрогата била откриена во Неготино. Околу 20 часот на булеварот „Маршал Тито“ во Неготино, полициски службеници дале наредба за запирање на „шкода октавија“ со скопски таблички, но возилото не застанало.
Веднаш потоа бил запрен автомобил „мерцедес“, чиј возач се обидел да избега. но набргу бил фатен. Потоа, при прегледот била пронајдена дрогата. Во четири патни торби се пронајдени околу 100 килограми висококвалитетна марихуана во вредност од околу 300.000 евра, која најверојатно потекнува од фабрика за производство на масло од канабис за медицински цели.
Набргу полицијата го лоцирала и сопрела автомобилот што прв требало да биде сопрен, „шкода октавија“, кое го управувал М.А., а совозач бил Н.А., а играло улога на претходница на „мерцедесот“.
Подоцна, со судска наредба, биле извршени претреси во домовите на приведените лица, при што кај М.А. биле пронајдени и одземени два пиштола, кои ги поседувал без дозвола, соопшти Сузана Прањиќ Талевска од МВР.
Од пронајдената марихуана би се произвело масло од канабис вредно 600.000 евра, уточни портпаролката на МВР.