Противзаконските манипулации во мрежата направени од засега непознати лица од селото Грчец, предизвикаа хаварија во дистрибутивниот систем поради што без снабдување со електрична енергија денес останаа и корисниците на дел на територија на Сарај, информираа денеска од ЕВН.
„По сериозниот дефект кој настана четвртокот наутро како последица на нелегално и неконтролирано контуинирано користење на електрична енергија од жителите на Грчец, селото имаше целосен прекин на испорака на електрична енергија“, велат од ЕВН.
Вчера, во доцните часови, дел од мештаните го вратиле снабдувањето со тоа што насилно и противправно влегле во енергетските објекти во сопственост на Електродистрибуција, а со тоа предизвикале огромна штета на целиот дистрибутивен систем во регионот.
Од ЕВН велат дека се на терен, со придружба на полиција и се обидуваат да го вратат напојувањето на што е можно повеќе корисници.
Жители на Грчец вчера излегоа на протест пред подружницата на ЕВН во Ѓорче Петров и бараат да добијат струја, односно да нема веќе прекини кои според нив се случуваат често. Тие обвинија дека во месец рамазан, свет месец за муслиманите, ЕВН ги оставило без струја и дека на овој начин ги казнуваат и оние што плаќаат, но и оние што не плаќаат струја.
Од ЕВН и вчера изјавија дека настанал дефект поради што снабдувањето со електрична енергија е во прекин и дека станува збор за последица на контуинирано неовластено и неконтролирано користење на електрична енергија од страна на мештаните.