По целовечерна борба на пожарникарите од Кавадарци и тим на „Национални шуми“, во 4 часот утрово бил локализиран и вториот пожар кај селото Брушани, информираа во Центарот за управување со кризи (ЦУК). Пожарникарите во овој реон вчера интервенирале во два наврати, прво во 17:30, кога пожарот бил изгаснат, а потоа и во 21:30 часот кога повторно настанал пожар.
Според oдговорните во ЦУК, во моментов нема потреба од ангажирање на хеликоптери, иако во текот на гасењето во опција било и барањето за ангажирање воздухоплови заради сериозноста на пожарот и непристапниот терен.
Вчера попладне во ЦУК бил пријавен шумски пожар кај селото Брушани, Општина Кавадарци, при што горела нискостеблеста шума и сува трева на површина од 4 хектари.