Претседателот Стево Пендаровски денеска го оцени како нереално барањето на ВМРО-ДПМНЕ уставните измени да се донесат, но да бидат со одложено дејство откако Македонија ќе стане земја-членка на ЕУ. Пендаровски вели дека лично би сакал да може тоа да се направи, но е апсолутно надвор од реалноста.
Пендаровски вели дека заклучоците на Европскиот совет се кристално јасни, во кои е наведено дека Македонија мора да ги направи уставните измени до крајот на скрининг процесот, за да може по автоматизам да продолжиме како земја со втора меѓувладина конференција со ЕУ и отворање на поглавјата.
Македонскиот претседател додаде дека ќе биде тешко остварливо да добиеме нови заклучоци од Европскиот совет, како би можеле да ги усвоиме уставните измени со одложено дејство.
„Тоа е нереално. Се надевам дека тоа не се користи како изговор за да не се влезе во уставните промени. Бев изненаден кога чув дека главната опозициона партија е подготвена да биде дел од Владата со пет ресори и да гласа од позиција на владејачка партија. За уставни проемни може да гласате и од позиција на опозиција“, изјави претседателот Пендаровски.
Тој додава дека и ако денеска се почне со процесот на уставни измени, за промени на Уставот се потребни најмалку три и пол месеци, а притоа треба да се искалкулира и дека во август парламентот не работи.