Националниот фронт, француската екстремна десница на политичарката Марин ле Пен, води во првиот круг од локалните избори, покажаа излезните анкети.
Ле Пен и нејзината внука Марион Марешал ле Пен на северот и на југоистокот на земјата освоиле повеќе од 40 отсто од гласовите. Ако информациите се потврдат, резултатите ќе претставуваат голем поттик за Ле Пен, која рече дека се надева дека нејзината антиимигрантска и антиевропска партија ќе победи во првиот круг на изборите.
Таквите резултати би можеле да бидат поттик и за понатамошната трка за претседателските избори во 2017 година. Вториот круг од локалните избори ќе се одржи на 13 декември.
Националниот фронт осигура 30,6 отсто од гласовите, покажа анкетата на „Ифоп-фидуциал“, освојувајќи повеќе гласови од конзервативната Републиканска партија на поранешниот претседател Никола Саркози и неговите сојузници. Републиканската партија добила 27 отсто од гласовите.
Како што се очекувало, владејачката Социјалистичка партија на актуелниот претседател Франсоа Оланд е трета со освоени 22,7 отсто од гласовите.