Вицепремиерот за европски прашања Бујар Османи на денешната прес-конференција го врати пописот „во игра“ од страна на политичките партии, но по завршување на изборите.
– Добро е да биде постигнат целосен консензус за Законот за попис и да се пристапи кон негова подготовка веднаш по изборите – рече Османи.
Вицепремиерот Османи потсети на причините поради кои пропаднал пописот во 2012 година.
– Обидот за попис пропадна во 2012 година поради начинот на читање на законот од двете етнички заедници. Консензус се постигна, но не и вкупен политички консензус во Собрание за усвојување на Законот. Мислам дека ова решение што е донесено на Влада е добро и треба да се спроведе, меѓутоа би било добро сите да бидат вклучени во пописот. По изборите, би требало да почнеме со подготовки за негово организирање – рече Османи.
Пописот во нашата земја, кој не е направен од 2002 година, требаше да се спроведе во април годинава, но се одложи поради одржувањето на предвремените парламентарни избори.