„Мостови на Струга“ за најдобра дебитантска книга, награда што ја доделуваат „Струшки вечери на поезијата“ и УНЕСКО, годинава ѝ припадна на поетесата од Шпанија, Паула Бозалонго.
– Од пристигнатите книги, особено се издвои книгата „Декември и се бакнавме“ од Паула Бозалонго, поетеса од Шпанија. Песните на Паула Бозалонго изненадуваат со својата конкретност и посредност, таа користи еден свеж, комуникативен поетски јазик, кој лесно воспоставува контакт и со публиката и со критиката и не случајно нејзината прва книга е на врвот од листите на најпродавани книги во Шпанија. Низ згуснат емоционален интензитет, го транспонира својот интимен свет низ конкретни и јасни слики. Оваа награда ќе ѝ биде поттик за распространување на поетските вредности на нејзиното зрело поетско писмо – информираат од „Струшки вечери на поезијата“.
Наградата „Мостови на Струга“ во изминатите години се избори за високо место меѓу поетските награди на светско ниво и стана една од најпосакуваните награди на поетите-дебитанти, која широко им ги отвора понатамошните патишта на творечка афирмација. Тоа го покажа и годинашниот интерес за неа и на адреса на СВП пристигнаа 14 книги.