Министерството за здравство заедно со Институт за јавно здравје и Центар за јавно здравје-Скопје извршиле санитарно-хигиенски увиди на загрозените подрачја од поплавата во скопскиот регион.
За превенција од појава на заразни заболувања се дадени следниве препораки:
– Да се користат водоотпорни ракавици, гумени чизми, заштитни очила и маски за лице при чистење на куќите.
– Темелно чистење на мувлата и калта со топла вода и детергент.
– Да се фрлат предметите кои биле во контакт со вода од поплавите или доколку нема поголеми оштетувања истите да се исчистат со топла вода и со детергент.
– Отпадокот да се фрла во канти или пластични кеси за отпадок и исклучиво во контејнери кои се наменети за таа цел.
– Самостојно не е дозволиво да се отстрануваат умрени животни, туку да се повика ветеринарна служба да го направи тоа.
– Заштита од комарци со употреба на спреј против инсекти (репеленти) и со носење светла облека, кошули со долги ракави и пантолони со долги ногавици, а на прозорците од домовите да се постават заштитни мрежи против комарци.
– Да се отстрани застоената вода од различни садови, саксии за цвеќе и стари гуми во областите каде што се размножуваат комарците.
Во случај на здравствени проблеми особено појава на дијареа и повраќање, зголемена температура и кожни промени тие апелираат да се побара медицинска помош во најблиска здравствена установа.