Mакедонско друштво „Илинден“ од Тирана, по повод шестгодишнината од основањето, на заслужни активисти им додели благодарници „Илинден“. Признанијата им се доделени на Џевит Дрини и на Хамит Гордани, активисти од Тирана, и на Ибраим Фетаху и на Мојси Халилај, активисти од областа Голо Брдо. Сите се членови на Македонско друштво „Илинден“ со седишта во Тирана и во Голо Брдо.
Од Република Македонија, благодарница ѝ е доделена на проф. д-р Катерина Тодороска, научен советник во Институт за национална историја – Скопје, за нејзиното научно творештво поврзано со историјата и со катадневниот живот на македонското национално малциство во Република Албанија. Таа е автор на книгата „Македонците во Албанија (1912- 1991)“.
– Благодарницата се дава на лица за нивните особени заслуги за научниот и за стручниот ангажман и за перманентните активноси во насока на зачувување и на одржување на идентитетот на припадниците на македонското национално малцинство во Република Албанија. Добитниците дале особен придонес за унапредување на животот, историјата, културата и за зачувување на автентичната македонска традиција во Албанија. Mакедонско друштво „Илинден“ од Тирана од неговото формирање на 6 февруари 2009 година, континуирано работи на заштитата на етничкиот, јазичниот, културниот идентитет и национални традиции на македонското национално малцинство. Воедно, наша заложба е и зајакнувањето на одличните билатерални односи меѓу Република Македонија и Република Албанија – вели претседателот на Македонско друштво „Илинден“ од Тирана, Никола Ѓурѓај.