Претстојниот викенд, на Плоштадот на револуцијата во Струга, ќе се одржи „Саем на медот”, манифестација организирана од Здружението на пчелари „Матица“ од Струга, а помогната од Мрежата за рурален развој од Македонија и градоначалникот на Општина Струга.
„Саемот на медот” во Струга ќе биде отворен во сабота, со пригодни обраќања на градоначалникот на Општина Струга, Зијадин Села, и директорот на Мрежата за рурален развој, Петар Ѓоргиевски.
На „Саемот на медот” со свои производи учество ќе земат пчелари од Скопје, Штип, Радовиш, Кочани, Битола, Прилеп, Охрид, Дебар и Струга.
„Саемот на медот” во Струга се организира за прв пат, а целта е да се промовираат пчеларските производи и да се иницира поголема застапеност на оваа стопанска дејност во Македонија каде има одлични услови за оваа дејност.
Тенденција на организаторите е „Саемот на медот” во Струга да стане традиционален.