Претседателот на Европската комисија, Жан Клод Јункер денеска изјави дека Европа прави прогрес во поглед на решавањето на бегалската криза и ја пофали германската канцеларка, која без разлика на критиките, и понатаму стои на својата политика.
Во интервју за германски „Билд“, во пресрет на самитот на ЕУ, на кој тоа прашање ќе биде една од главните теми, Јункер рекол дека историјата ќе ја потврди исправноста на либералната политика која Меркел ја води кон мигрантите.
Претседателот на ЕК рекол дека и поединечните потези ќе придонесат за решавање на мигрантската криза, но рече дека ќе биде потребно одредено време.
– Барем гледаме некои први чекори – рече Јункер.
Тој рекол дека шефовите на владите би требало да стојат на својата политика, дури и под притисок.
– Политиката кон мигрантите која таа и јас ја застапуваме ќе надвладее. Треба да се има политичка сила и да се каже, ние тоа го можеме. Сето останато е капитулација пред популистите – рече Јункер.