Министерот за одбрана, Зоран Јолевски, денеска присуствуваше на тркалезната маса што се одржа во Комитетот за вооружени сили во Сенатот на САД. Говорници на настанот биле сенатори, конгресмени и претставници од Југоисточна Европа.
Како што информираат од Министерството за одбрана, Јолевски истакнал дека интеграцијата на земјите од регионот во НАТО и во Европската унија ќе придонесе за понатамошно зајакнување на земјите од регионот и позитивно ќе влијае врз стабилноста и врз просперитетот на земјите од Југоисточна Европа. Јолевски побарал што поскоро на Македонија да ѝ се даде покана за членство во НАТО.
За време на дискусија на тема „Безбедноста и мигрантската криза во Западен Балкан“, организирана од германскиот „Маршал фонд“, Јолевски порачал дека е потребна поголема соработка и координација меѓу државите зафатени од неа.
– Кризата со мигрантите е заеднички предизвик на Европа и затоа има потреба да се зголеми соработката и координацијата помеѓу државите погодени од неа. Последните настани ја наметнаа неопходноста од поддршка, обединување, не само во ЕУ, туку и пошироко – рече Јолевски.