На денешната владина седница ги усвоивме предлог-измените на Законот за заштита на население од заразни болести, со кои инспекциските служби добиваат нови поголеми овластувања за справување со прекршителите на ковид протоколите, информираше заменикот на претседателот на Владата за борба против корупција и криминал, за одржлив развој и човечки ресурси, Љупчо Николовски на неговиот фејсбук-профил.
„Законските измени се однесуваат на Државниот пазарен инспекторат, Државниот инспекторат за труд, Државниот испекторат за транспорт и за другите инспекторати на централно и локално ниво. Според измените, доколку инспекторите утврдат прекршување на здравствените протоколи, ќе имаат овластување на лице место да изречат привремена забрана за вршење на дејноста во траење до 30 дена на правните субјекти. Истовремено, со новите законски измени ќе се зголемат паричните казни за прекршителите на здравствените протколи. Висината на казните ќе биде во зависност од големината на фирмите,“ напиша Николовски.
Тој најави нулта толеренација за прекршителите на здравствените ковид- протоколи.