Курсот на денарот е стабилен, нема дилеми за инфлација, гарантираме дека нема да има потреси за извозниците – оцени гувернерот на Народна банка, Димитар Богов по повод излегувањето на Велика Британија од Европска Унија и можните реперкусии врз македонската економија.
Според него, Македонија не може да влијае на глобалните движења, но она низ што ќе поминува економијата на Европската Унија ќе се одрази и врз нашата, бидејќи сме извозно-ориентирана земја.
– Она што најпрво треба да направиме е да ја стабилизираме домашната политичка ситуација и да ги намалиме ризиците на домашен план. Кога сме во бура, се гледа кој има цврста куќа, а кој не – додава Богов.
Тој истакна дека Брексит нема да се одрази на девизниот курс и сигурноста на банкарскиот сектор, но кредитирањето ќе биде намалено.