Во интервју за порталот „Прес 24“, премиерот Никола Груевски зборува за неколку актуелни прашања, за неговото обраќање пред пратеничката група на Европската народна партија, за европската иднина на Македонија, гасоводот, Куманово и слично.
Еве ги неговите ставови за некои од тие теми:
За европската иднина на Македонија: „Многу јасно кажав дека иднината на Македонија е во НАТО и во ЕУ. Патем, тоа го имаме демонстрирано и преку бројните наши учества во НАТО и во ЕУ-мисиите. Значи, ниту јас, ниту Владата немаме дилеми за ова прашање“.
За руските знамиња на митнгот на ВМРО-ДПМНЕ: „Ги видов сликите и од она што го забележав, станува збор за неколку, можеби два-три такви случаи. Живееме во демократија и не можеме да им забраниме на луѓето што да облечат или кого да симпатизираат. Сепак, сосема друга работа е стратешката определба.“
За Куманово: „Досега немаме податок дека некоја држава или нејзина разузнавачка служба, вклучувајќи ги и гореспоменатите, дала логистика или на кој било начин ја поттикнала криминално-терористичката група да го стори делото.“
За прислушувањето и за странските служби: „Во денешно време на огромен технолошки напредок на најголемите суперсили во светот во разузнавачко-безбедносната и во телекомуникациската сфера, меѓу кои ги вбројувам САД, Германија, Франција и Британија, мислам дека не им е потребенa осомничената агентурна мрежа во Македонија, доколку одлучат да дојдат до таков вид материјали. Оттука, нема логика тие да стојат како организатори на овој процес“, истакна премиерот.
Но, тој е сигурен дека станува збор за странски служби „ И во исказите на двајцата од осомничените, а едниот од нив и со судска пресуда, се кажува дека самиот Верушевски им говорел дека материјалите што тие илегално ги снимале, за што признаа дека примале и паричен надомест, се наменети за странска разузнавачка служба. Тоа се искази на неговите соработници“, вели премиерот.
За „Турски тек“: „Нашиот став за овој проект е дека кога Брисел и Москва ќе постигнат договор за него, ние би се вклучиле.“