Репортерот на „Волстрит журнал“, Еван Гершкович, поранешниот американски маринец Пол Вилан и руско-американската новинарка Алсу Курмашева слетаа во САД, по најголемата размена на затвореници меѓу Русија и Западот од Студената војна.
Како што известува CNN, повратниците биле пречекани од нивните семејства во заедничката база Ендрјус во Мериленд, каде што присуствуваа и претседателот Џо Бајден и потпретседателката Камала Харис.
Гершкович им се обрати на медиумите, велејќи им на своите колеги од Вол Стрит Журнал зборовите што чекаа да ги слушнат повеќе од една година. „Јас сум дома“, рече тој.
Враќањето го означува крајот на она што Бајден го нарече „брутално искушение“ за тројцата Американци и нивните семејства по нивните притвори во Русија, каде што затворениците често се чуваат во ужасни услови. 54-годишниот Вилан помина речиси шест години во руски затвори по неговото апсење во Москва во декември 2018 година, додека Гершкович беше во притвор повеќе од една година. Двајцата беа осудени под обвинение за шпионажа, а американскиот Стејт департмент нивниот притвор го оцени како незаконски.
Новинарката на Радио Слободна Европа Курмашева, беше приведена во октомври 2023 година и беше прогласена за виновна за ширење лажни информации за руската армија, а нејзиното семејство и работодавачот ги негираа обвиненијата.
Нивното ослободување – и тоа на соработникот на Вашингтон пост и постојан жител на САД, Владимир Кара-Мурза (42) беше организирано како дел од сложената размена на затвореници меѓу Русија, САД и другите западни нации во која беа вклучени вкупно 24 затвореници.
Шеснаесет лица беа ослободени од руски притвор во четвртокот, меѓу кои пет Германци и седум руски државјани кои беа политички затвореници во нивната земја. Москва за возврат доби поранешниот висок полковник на ФСБ, Вадим Красиков, како и неколку лица обвинети за шпионирање или сајбер криминал.