Странските дипломати што доаѓаат во Македонија, не доаѓаат со готови решенија, туку сакаат да помогнат, изјави потпретседателот на движењето Беса, Африм Гаши, по средбата со поранешниот премиер и шеф на шведската дипломатија, Карл Билт.
– Бараат начини како може да се помогне, како ние заеднички би можеле да се договориме за излез од кризата. Сите надворешни дипломати што се дојдени досега, барем според пристапот што го имаат кон Беса, сакаат да помогнат Македонија што побргу да излезе од сегашната криза – рече Гаши.
На средбата со Билт, како што рече Гаши, било разговарано за актуелната политичка состојба, за начините за излегување од кризата, но и за тоа „кои се Беса и како се дојдени на политичката сцена“.
– Сакаше да се запознае со Движењето Беса како нов субјект, да дознае кои се нашите гледишта за процесите и за државата, но поголем дел од времето го потрошивме на наоѓање начини како Македонија би можела да излезе од кризата – рече Гаши.