Екипи на АД Електрани на Северна Македонија, денеска започнаа да го отстрануваат опожарениот топловод на мостот „Беласица”, кој беше оштетен пред околу два месеци, соопштија оттаму. Предвидено е, додаваат во претпријатието, демонтажата да се заврши во најкус можен рок, за во следната грејна сезона која почнува во октомври 2023 да има сигурна и непрекината испорака на топлинска енергија.
Инаку мостот сè уште е вон употреба. На 12 мај изби пожар кој беше причина да биде затворен за сообраќај. Пожарникарите не смееле да гаснат затоа што немале информации какви инсталации минуваат под мостот.
Како што тогаш соопштија од Центарот за управување со кризи, под мостот имало само една електрична инсталација со која се напојуваат светилките на мостот, а во средина на мостот минувала цевка со дијаметар од еден метар, низ која минува топла вода за парното во Скопје.